Gueules noires ...

L'histoire du pain d'alouette / Simon Colliez

C'est l'heure du briquet: c'est un moment convivial que les mineurs apprécient...
le reste du casse-croûte est rapporté à la maison c'est ce qu'on appelle le pain d'alouette...


J’avos cinq ou six ans peut-ete
A l’époque ed l’occupation
Min père m’ raménot l’ pain d’alouette
Pour que j’ souffre moins des privations
L'pain d’alouette faut que j’vous l’dise
Chétot eune tartine arséquée
Qui avot un tiot goût d’ pain d’épice
Min père i l’ prél’vot d’sin briquet
Aussi quand i rintrot de l’mine
Bien mate d’avoir fait du carbon
Dins chel’ malette comme eune fouine
J’allos récupérer ch’crouton
Et demander de m’voix fluette
Tout in bavant d’sur min cotron
Pourquoi app’ler l’pain d’alouette
Chés tartines qui m’semblot si bon
Alors in s’essuyant s’ moustache
Barbouillée d’ soupe tout alintour
I m’ racontot d’un ton plus grave
L'plus belle des histoires d’amour
L’ pain d’alouette, min tiot bonhomme
Il est fabriqué pendant l’ nuit
Alors que tous les gosses i dorment
Rêvant aux anges du paradis
Tandis que dins l’ fin fond de l’mine
Accroupi pendant sin briquet
L’ mineur in grignotant s’tartine
Fait querre des miettes intre ses pieds
Alors toutes les souris del’ fosse
Dins les bowettes et les cassis
S’in vont par les creux et les bosses
Ramasser l’ pain qu’in leur a mis
Après avoir nourri lu mioches
Blottis dins leu tiot nid douillet
Bien à l’abri d’ tous les coups d’ pioche
L’ pain si bon, i vont l’ fabriquer
Ainsi l’ crouton noir de l’ malette
Qui t’régale et qui t’sempe si bon
J’l’ai trouvé intouré d’équettes
Chétot l’ paradis min garchon
J’avos cinq ou six ans peut-ete
Souvint min père i m’racontot
L’histoire du bon pain d’alouette
Que tous les jours i m’raménot
Asteure qu’ les années ont passées
J’m’in rinds compte mieux que personne
Que l’ bout d’pain souvint armonter
A fait de moi papa, un homme.